Авторĕсем  Михайлова Е.М., Клементьева Л.Н.

Республика шайӗнче сӑвӑ илемлӗ вулакансен Вера Кузьмина ячӗллӗ ăмăрту иртрĕ . Хавхаланса, артистла сӑнарласа сӑвӑ калакан ачасемпе ҫитӗннисен пултарулӑхне хаклама Вера Кузьмина хӑй ҫулсеренех килекенччӗ. Пурте юратакан сцена ӑсти ҫур ҫул каялла пиртен ӗмӗрлӗхе уйрӑлса кайрӗ. Пухӑннисем ӑна пӗр минут шӑп тӑрса асӑнчӗҫ.

 Кӑҫал ӑмӑртӑвӑн пирвайхи тапхӑрне 700 ытла ҫын хутшӑннӑ. 131-шне йӗркелӳҫӗсем финалта курма кӑмӑл тунӑ. Вӗсенчен чӑвашла сӑвӑ е калав калакансем - 91-ӗн, 40 ҫамрӑк артист вырӑсла хайлавсене вуланă. 2015-мӗш ҫулта, литература ҫулталӑкӗнче, пуҫарса янӑ ӑмӑртӑва, илемлӗ вулакансен ӳсӗмне кура, 5 ушкӑна пайланă, унта ача садне ҫӳрекенсенчен пуҫласа ватти-вӗтти хутшӑнма пултарнă

Пирĕн шкултан 9-мĕш класра вĕренекен, Виктория Захарова, финалта хутшăнчĕ. Вăл Раиса Сарпи Вера Кузьминана халалланă «Амăшĕ» сăввине вуласа уява пуçларĕ. «Поэзи» номинацинчен 1-мĕш степеньлĕ дипломпа таврăнчĕ.

Викторие малалла та ăнăçусем сунатпăр, çĕнтерÿпе саламлатпăр.